Émeutes contre l’installation d’exploitations sur les communaux
Interrogatoire de Pierre Garnier, complice des villageois qui ont abattu les haies d’exploitations nouvellement installées de la Chapelle-Montmartin82. (Original, Arch. dép. Cher, 8 G 2097, 18 septembre 1492).
A tous ceulx qui ces presentes lectres verront, Jehan Salat, licencié en loix, lieutenant de noble home et saige maistre Pierre de Ganay, aussi licencié en loix, seigneur d’Azy, conseiller du roy nostre seigneur et son bailly de Berry, salut. Savoir faisons que aujourdhuy nous nous sommes transportez es prisons de la chambre des comptes du roy nostre seigneur à Bourges, par devers et a la personne de Pierre Garnier, prisonnier esdites prisons, aagé de XL ans ou environ, de la paroisse de la Chappelle Moynemartin, a nous renvoyé par messeigneurs de la court de Parlement pour proceder a la pugnicion des exces, monopoles et assemblees faictes contre les officiers du roy par lui et autres ses aliés et complices, ainsi que verrons estre affaire par raison, nonobstant opposicion ou appellacion quelzconques jusques a sentence diffinitive, inclusive de mota execucione s’il en est appellé, et pour iceulx faire et parfaire le proces dudit prisonnier, lequel prisonnier, apres le serment par luy faict de dire verite, nous a dit et confessé sans aucune contrainte, en presence d’honorable homme et sage maistre Giles Pain, procureur general du roy nostredit seigneur ou dit bailliage, et de Guillaume Chaumeau, clerc notaire de la cour de Bourges et commis du greffier dudit bailliage, que ou mois de janvier dernier passé, autrement du jour ne s’est recordé, Jehan Garnier son frere l’envoya querir par un petit garçon son filz, lequel luy dist qu’il allast devant l’eglise de la dite Chapelle Moynemartin ou estoit ledit Pierre Garnier son frere et plusieurs des habitans dudit lieu, lequel prisonnier y alla et quant il fut devant ladite eglise, il trouva ledit Jehane Garnier son dit frere, ung nommé Estienne Salvet, Jehan Bezard, Jehan Gallette, Jehan de Bourges, Guillot et Colin Bedaulx, freres, Jehan Bedaulx, filz de Jehan Bedaulx, Jehan Thierry et Jehan Thierry, fils de Estienne Thierry, Denis Bezard, Jehan Mesnil et aultres des noms desquelz il ne s’est recordé, tous lesquels et ledit prisonnier, apres que ledit Salvet leur eut dit qu’il estoit venu de Paris et qu’il avoit trouvé par conseil que ilz devoient garder certain arrest de la court de Parlement qui avoit esté donné a leur prouffit contre les venerables de la Saincte Chapelle du pallaiz de Bourges, conclurent qu’ilz yroient rompre et abatre les hayes qu’avoient faictes Guillaume Moreau, Guillaume Dupuy, Jehan Pichon, Estienne Gallier, et autres ; et, de fait, incontinent apres la dite conclusion prise, luy, touz les dessusditz et autres jusques au nombre de vingt habitans dudit lieu de la Chappelle Moynemartin allerent rompre et abatre lesdites hayes des dessusdits Dupuy, Gallier, Pichon et Moreaul, lesquelles hayes ilz avoient faictes es heritaiges qu’ils tiennent desdits venerables du Pallais, combien qu’ils soient usagiers communaulx ausditz habitans, ainsi que disoient ledit prisonniers et sesdits compaignons ; et estoient enbastonnez, c’est assavoir ledit prisonnier d’une forche de boys, ledit Jehan Thierry d’un espieu, ledit Guillaume Bedaulx d’une congnye et ung autre, du nom duquel il ne s’est recordé, d’un espieu et plusieurs autres de congnyes, pour rompre lesdites hayes ; et apres qu’ils les eurent rompues, s’en allerent chascun en leur maison. Et depuis fut constitué prisonnier par Anthoine Amy, sergent royal, par vertu de la commission de monseigneur le bailly, ou de nous, et troys autres de sesdits compaignons, c’est assavoir lesditz Denis Bezard, Jehan Thierry et Jehan Viguier, et les amenoit prisonniers le dit Amy en ceste ville de Bourges. Et quant ils furent a Preuilly83 en l’ostel d’ung nommé Cavet Euvrardet audit lieu, Jehan Bezard, Pion Chambrias, Jehan Mesnil dit Courtin, Guillaume Bedault dit Darme, Colin Bedault dit Darme, Jehan de Bourges, Guillaume Viguier, Jehan Robin, Loys Salvet, Loys Mace, Jehan Thierry, fils de Estienne Thierry, Pasquet Mesnier et plusieurs autres ne scet jusques a quel nombre, parce qu’il ne les vit pas trestous, lesquels dirent au dit sergent qu’ilz vouloient avoir lesditz prisonniers qu’il emmenoit ; et en parlant ensemble, maistre Estienne Dupont sortit hors de la chambre ou ils estoient et apres lui s’en sortirent lesditz Jehan Thierry et Denis Bezard, prisonniers, et ledit Viguier s’en sortit par la fenestre, devant laquelle y avoient le dit Bezard et austres qui demandoient tousjours lesditz prisonniers audit Amy, lequel leur respondit quilz estoient prisonniers du roi, et que s’ils estoient saiges ilz ne les lui ostereoient pas et qu’ilz se mectoient en dangier. Interrogé si ledit Jehan Bezard ou autre de ses compaignons osterent pas par force lesditz prisonniers audit Amy, et si ledit Bezard lui bailla pas un coup de forche sur le bras et un coup de javeline tellement qu’ilz le blesserent en la main jusques a grant effusion de sang pource qu’il ne vouloit lascher le dit Viguier, lequel ilz vouloient tirer a force par la fenestre, dit que non ; bien vit le dit Amy qui seignoit de la main ung peu durant ledit debat, mays ne scet qui luy avoit fait. Interrogé si tous les dessus ditz qui furent à la recouvre desditz prisonniers, ou aucuns d’eulx, disoient pas au dit sergent qu’ilz auroient et leur rendroit lesditz prisonniers de bon gré ou par force, en jurant, blasfemant et regnyant Dieu, dit que non+. Interrogé pourquoi les dessusditz habitans de ladite Chappelle Moynemartin ne recouvrerent ne emmenerent ledit prisonnier comme les autres, dit que ce fut pource qu’il ne s’en voult pas aller et sortir de ladite chambre car il cognoissait bien qu’il et sesditz compaignons avoient tort d’eulx en aller, et aussi ceulx qui les recouvroient et emmenoient, et ne monta, ne fut monté par le dit Amy, ne autre, dans la chambre haulte de ladite maison dudit Cavet, affin qu’il ne fust recours et emmené par les dessusditz, et ne bougea de la chambre basse ou il et ledit Amy et sesditz compaignons prisonniers avoient toujours esté. Interrogé par quelle auctorité et puissance ilz firent la dite assemblee pour aller rompre lesdites hayes, et qui leur avoit donné congie d’eulx assembler, dit que ilz firent ladite assemblee de leur auctorite privee, sans congie et auctorite de justice, et auparavant n’en avoient point fait. Interrogé si, en rompant lesdites hayes, lui et ses dits compaignons et complices qui étaient a rompre ne foullerent et ne gasterent pas les bles de ceulx a qui estoient lesdites hayes, en jurant et blasfement et regniant Dieu et les voulant battre pource qu’ils leur contredisoient, et vouloient empescher qu’ilz ne les rompissent, et leur disoient pas qu’ilz et leurs biens estoient en la saulvegarde du roy, laquelle leur avoit este notifiee, en se moquant et disant par desrision : « Trupt, trupt, on ne vous touche, tu nes pas roy ne royne », dit que non, et dit que si un de ceulx a qui estoient lesdites hayes eust dit audit prisonnier qu’ilz estoient en la saulvegarde du roy, il n’eust point aydé a abatre lesdites hayes. Interrogé si dist pas a Jehan Lore dit Pichon telles ou semblables parolles « va villain tes seigneurs ne sont que moynes et maugre eulx nous ferons hayes a chasser les serfs et biches », dit que non ; et furent lesdites hayes rompues depuis l’arrest donné pour ces habitans contre les venerables et executé par un de nos seigneurs de ladite court, duquel il ne scet le nom. Interrogé si, depuis l’execution dudit arrest, il et sesdits complices dudit lieu de la Chappelle Moynemartin ont pas esté on boys de Ruynes, appartenant ousditz venerables, et d’ycellui transporté certaine quantite de boys que lesditz venerables avoient venduz à des charbonniers, dit qu’il n’y a point esté, et ne scet point que aucun desditz habitans y aye esté. Interrogé si des choses dessusdites et chascune d’icelles il s’en veult rapporter a Perette, vesve de feu Estienne Daguenet, Martin Besson, Pasquette, vesve de feu Jehan Petion, Jehan Lore dit Pichon, Guillaume Dupin, Thomas Lore dit Pichon, Estiennete, femme de Guillaume Gallier, Plaisance, femme de de Jehan Moireau, frere Jehan de la Vallee, Guillemette, vesve de feu Martin Menart, Michau Moireau, Jehan Habert, Jehan Besson, et frere Guillaume Pecton, dit que non parce qu’ilz sont adverse partie et qu’ilz vouldroient qu’il et autres desdits compaignons et complices feusssent destruictz, et au regard dudit Martin Besson, il ne le congnoist. Fait a Bourges, par nous lieutenant commis dessus dit, et donné sous le seel es causes dudit bailliage en tesmoing de ce, le XVIIIIe jour de septembre. L’an mil CCCC quatre vingt et douze.
[signé] Chaumeau, pour le greffier.
+ qu’il oyst pource qu’il est sourt et entend dur, comme cy dessus
Évolution décennale des tailles et des bourgeoisies de la seigneurie de Graçay (1436-1493)
(Les pourcentages se lisent horizontalement)
|
Années |
Bourgeoisies |
% |
Taillables |
% |
Total |
|
1436 |
144 |
61,8 |
89 |
38,2 |
233 |
|
1446 |
182 |
62,8 |
198 |
37,3 |
380 |
|
1456 |
221 |
68 |
104 |
32 |
325 |
|
1461 |
376 |
76,9 |
113 |
23,1 |
489 |
|
1466 |
552 |
81,7 |
124 |
18,8 |
676 |
|
1470 |
655 |
85,6 |
110 |
14,4 |
765 |
|
1481 |
756 |
90,7 |
78 |
9,3 |
834 |
|
1493 |
781 |
92,2 |
67 |
7,9 |
848 |